Mediaverklaring

• 21 Oktober 2023
• Anneke Langner

Laerskool Elarduspark is die beste Bybelkenners van 2023

“Om die jeug te ondersteun en te laat groei in die Bybel, is een van die suiwerste vorme van naasteliefde, iets waarna elkeen van ons kan streef.” Só sê dr. Hennie Schmidt wat die Rapportryerbeweging (RRB) se jaarlikse nasionale Bybelvasvrakompetisie oorsien.

Oor die naweek van 20 Oktober het die finale rondte van die Rapportryers se nasionale Bybelvasvrakompetisie by die ATKV-oord te Klein Kariba plaasgevind.

Die Rapportryers is trots om vanjaar vir die 44ste jaar een van die land se grootste Bybelvasvrakompetisies aan te bied. ’n Rekordgetal van 99 spanne (ongeveer 400 leerlinge) regoor die land het vanjaar aan die kompetisie deelgeneem en dit is ook die eerste jaar wat hoërskoolleerders aan die kompetisie kon deelneem.

Johan Roos, president van die Rapportryers, vertel dat die Bybelvasvra aanvanklik net as ’n plaaslike geleentheid aangebied is, maar het binne twee jaar tot ’n nasionale projek gegroei.

“Die Rapportryers is ’n Christelike organisasie waar ons Christenskap wil bevorder. Ons kan dit nie net sê nie, ons moet dit ook uitleef, daarom bied ons jaarliks die Bybelvasvra aan. Ons wil ook graag mense uitnooi om betrokke te raak. Enige iemand kan betrokke raak, dit is nie net vir ’n sekere groep nie,” sê Roos.

Tien spanne van nege laerskole het deurgedring om die finale rondte by te woon. Die hoërskole se finaal het op 30 Augustus plaasgevind, waar Hoërskool Zwartkop in Centurion die eerste plek gehaal het. Laerskool Elarduspark het met die eerste en derde prys vir die Laerskoolafdeling weggestap en Laerskool Randhart van Alberton het die tweede plek ingeneem.

Die wenskool ontvang ’n wisseltrofee en R7000 kontant. Die tweede span ontvang R5000 en die derde span R4000.

Dr. Danie Langner, besturende direkteur van die FAK, is vanjaar die beskermheer van die Rapportryers en het ook die finale rondtes die naweek bygewoon.

Daar is geen beperking op die aantal spanne wat ’n skool, gemeente of instansie kon inskryf nie. Die spanne bestaan uit vier leerders (wat nie in dieselfde graad hoef te wees nie) en daar is ook geen voorskrifte vir hoe spanne in terme van seuns of meisies saamgestel mag word nie. Die skrifgedeeltes wat die leerlinge moes voorberei was Deuteronomium 1-4, Matteus 1:18-14 en Filippense 1-4. Die Afrikaanse 1983-vertaling met herformulering of die Engelse NIV-Bybel kon gebruik word vir voorbereiding.

“Ek dink dit is belangrik om aan die Bybelvasvra deel te neem, want dit help ’n mens om Christelik te groei en dwing jou om die Bybel uit jou kop te ken. So bly mens ook op die regte pad,” sê Lika de Jongh van Hoërskool Zwartkop.

Vir Chay Belr Karsen (gr. 7 van Laerskool Elarduspark) was sommige vrae moeilik, maar vir ander vrae dink sy sal haar span volpunte kry.

Behalwe vir die pasmaats en kortvrae, was die vraestel vir Tyron Engelbrecht (gr. 7) van Laerskool Pietersburg-Oos “nogal maklik en lekker”.

“Ek leer so baie lewenslesse van die Bybel. Ek leer eintlik so baie dat as my ma my iets vra, dan het ek al die antwoorde vir haar,” vertel Isabella Peach (gr. 7) van Laerskool Elarduspark. “Bybelvasvra is vir my lekker, want ek geniet dit om saam met ander uit die Bybel te leer,” sê Lisa Sydney van Laerskool Pietersburg-Oos.

Juffrou Dela Kruger van Laerskool Pietersburg-Oos skryf al spanne in vir die Rapportryers se Bybelvasvra van 1997 af. Sy vertel hoe sy met haar kind as baba in die arm gesit en Bybelvasvra-vraestelle gemerk het.

“Soveel kinders kom na my toe terug en vertel my wat hulle kon toepas in hulle eie lewe, net omdat hulle aan die Bybelvasvrae deelgeneem het. Selfs universiteitstudente het al vir my kom sê dat die Bybelvasvra-kompetisie hulle geleer het hoe om te leer,” sê Kruger.

Die kinders moet 18-20 hoofstukke uit die Bybel voorberei vir die kompetisie. Dit is ongeveer 800 verse. Die toets bestaan uit ses korter vraestelle en daar is ’n tydlimiet aan verbonde om elke vraestel te voltooi. Die toets se duur is 60 minute.

“Dit is ongelooflik om te sien hoe die Bybelvasvra die kinders se leesvaardigheid en selfvertroue verbeter. Die Bybel is op ’n hoër standaard geskryf as wat van ’n laerskoolkind verwag word om te kan lees, daarom berei ons die kinders van gr. 3 af al voor,” sê Kruger.

Kruger vertel verder hoe sy die kinders se regterbreine met die Bybel stimuleer. Moeilike hoofstukke in die Bybel soos die saligsprekinge leer sy die kinders visueel uitbeeld om begrip te bevorder. Die spanne wat inskryf, is ook veelsydige leerlinge en is by baie aktiwiteite betrokke.

“Dit is moeilik om ’n tyd te kry vir voorbereiding tussen die kinders se besige programme, daarom spandeer ons twee keer ’n week tussen sesuur en agtuur in die aand om voor te berei.”

Die Rapportryerbeweging hoop om volgende jaar nog meer inskrywings te ontvang, veral van hoërskole, sodat die projek kan aanhou groei en meer jongmense die Bybel ter harte sal leer ken.

Anneke Langner

Slimkoppe wys hul staal in nasionale Bybelvasvra

• 23 Oktober 2023
• Maroela Media

Laerskool Elarduspark in Pretoria het met die eerste en derde prys in die laerskoolafdeling van die Rapportryersbeweging (RRB) se Nasionale Bybelvasvrawedstryd weggestap.

Laerskool Elarduspark het vanjaar die Rapportryersbeweging se Bybelvasvrawedstryd gewen.

Laerskool Randhart van Alberton het die tweede plek ingeneem. Die eindronde van die kompetisie het die naweek by die ATKV Klein Kariba naby Bela-Bela (Warmbad) plaasgevind.

Die RRB het vanjaar vir die 44ste jaar een van die land se grootste Bybelvasvrae aangebied. Die Bybelvasvra is ʼn vlagskipprojek wat in 1977 deur die RRB van stapel gestuur is om Bybelkennis by jong mense reg oor die land te bevorder.

Bybelvasvra 2023

• 30 Augustus 2023
• Johan Roos

Die Rapportryerbeweging (RRB) se nasionale vlagskipprojek, die Bybelvasvra, se uitdunrondte vir laerskole (Graad 5 tot 7) en die finaal vir hoërskole (Graad 8 tot 10) is pas afgehandel.

Die spanne het uitstekend presteer en die vraestelle was buitengewoon straf. Die RRB is baie opgewonde en dankbaar dat inskrywings vir die Bybelvasvra aansienlik sedert verlede jaar tot 99 spanne gegroei het – 17 meer as die vorige jaar!

In die hoërskool-afdeling het Hoërskool Zwartkop van Pretoria met die louere weggestap. Die span was werklik baie goed voorberei en het uitstekend presteer. Die RRB is inderdaad baie trots op die span en sien daarna uit om hulle tydens die finaal vir laerskole by die ATKV-oord, Klein-Kariba, te onthaal.

Oudergewoonte was die laerskole se deelname aan die uitdunrondte van die Vasvra, wat dwarsoor Suid-Afrika geskryf is, iets baie besonders. Die opgewondenheid was 'n lus vir die oog, en die gees en gesindheid van die spanleiers en spanne was werklik 'n belewenis om te ervaar.

Die RRB wil graag die TOP 10 SPANNE, van harte gelukwens met die prestasie om na die finaal deur te dring. Baie sterkte aan julle met jul finale voorbereiding, en mag julle die Bybelvasvra geniet en altyd onthou as iets baie besonders en lekker waaraan julle deelgeneem het.

Die Laerskole TOP 10 SPANNE wat na die finaal deurdring, in alfabetiese volgorde, soos volg;

Constantiapark 1	Pretoria
Die Krans 1	Pretoria
Elarduspark 1	Pretoria
Elarduspark 4	Pretoria
Eversdal 1	Durbanville
Hennopspark 2	Pretoria
Lichtenburg 1	Lichtenburg
Pietersburg-Oos 1	Pietersburg
Randhart 1	Alberton
Stephanus Roos 1	Pretoria

Graag wil die RRB ook al die ander spanne bedank vir hul deelname. Landswye deelname maak die Bybelvasvra iets baie uniek en 'n absolute trots vir 'n ieder en ‘n elk wat daarby betrokke is.

Baie spanne was ongelukkig om nie na die finaal deur te dring nie. Die punte wat die meeste spanne behaal het was bogemiddeld hoog, wat getuig van harde werk.

Die RRB sien daarna uit om die topspanne te onthaal en gesellig saam by die ATKV-oord te Klein-Kariba gedurende die naweek van 20, 21 en 22 Oktober 2023 te verkeer.

Johan Roos

Uitdunrondte van die Rapportryers se Bybelvasvra

• 21 Augustus 2023
• Johan Roos

Jakaranda Rapportryers het Maandag 21 Augustus, die eer en voorreg gehad om in Pretoria, die uitdunrondte van die Rapportryers se Bybelvasvra aan te bied. Agtien spanne het aan die uitdunrondte deel geneem.

Die verrigtinge het plaasgevind by Laerskool Elarduspark, ons opregte dank aan die personeel van Laerskool Elarduspark, vir die beskikbaar stelling van hul fasiliteite, asook verversings en voorbereiding vir die uitdunrondte. Die RRB waarder dit opreg.

Getrou aan tradisie, was die gees en gesindheid waarin die uitdunrondte plaasgevind het, werklik 'n belewenis om te ervaar. Die onderskeie spanne was duidelik baie gemotiveerd, die spanning was duidelik, wat egter uitstaande was, is dat die spanne die uitdunrondte geniet het, die Bybelvasvra ervaring was nie net vir die spanne en afrigters baie lekker nie, maar ook vir 'n ieder en elk wat teenwoordig was.

Die RRB sien uit na die bekend stelling van die top 10 spanne nasionaal wat deurdring na die finaal by Klein-Kariba, 20 en 21 Oktober 2023. Verseker gaan daar spanne wees wat gisteraand by Elarduspark deel geneem het. Ons sien uit om julle daar te sien.

Baie sterkte en voorspoed met jul voorbereiding vir die finaal, mag dit vir almal 'n onvergeetlike ervaring wees.

Johan Roos

Ouboet 2023

• 19 Augustus 2023
• Johan Roos

Saterdag, 19 Augustus 2023, was dit die voorreg van die Jakaranda Rapportryers om 20 seuns van die Abraham Kriel Kinderhuis te trakteer, by die Wonderboom Lughawe.

Die seuns het skyfgeskiet, self golfkarretjie gery, in 'n groot brandweerwa op die aanloopbaan gery, elkeen het self sy eie braaitang gebou, meer gerleer oor vliegtuie, ingeklim, en ook in 'n opleiding kajuit vliegtuig gevlieg.
Dit seuns het middag-ete hul eie vleis gebraai met die braaitang wat hulle gemaak het, en waarop hulself hulle naam op gegraveer het.

Die dag is afgesluit waar 'n geskenkpakkie aan elke seun oorhandig is. In die pakkie was ook 'n Bybel wat die seun kon saamneem.
'n Motiveringspraatjie is ook vir die seuns aangebied.

Die seuns het werklik die dag baie geniet en kon die Jakaranda Rapportryers nie genoeg bedank nie.

Kragdag 2023

• 9 - 12 Augustus 2023
• Johan Roos

Jakaranda Rapportryers het die voorreg gehad om tydens die vier dae lange Kragdag, 'n biertuin te kon aanbied.

Die Kragdag gaan werklik jaarliks van krag tot krag. Die grootte van die uitstalruimte het die jaar twaalf rugbyvelde beslaan.
Meer as 60 000 besoekers het oor die vier dae Kragdag besoek.

Die fondse ingesamel tydens Kragdag sal, soos elke jaar, aangewend word vir verdienstelike liefdadigheids projekte. Die Jakaranda Rapportryers het ook skitterende blootstelling in die tyd geniet.

Die biertuin was werklik 'n lus vir die oog, 'n baie gewilde kuierplek vir die Kragdag besoekers, asook vir die uitstallers.

Die gees en gesindheid waarmee Jakaranda Rapportryers die projek aangepak het, was werklik verblydend.
Die toegewydheid en samehorigheid van die lede het beslis bygedra tot die sukses van die Kragdag.

Ons sien uit na volgende jaar!

𝐃𝐢𝐞 𝐕𝐨𝐨𝐫𝐭𝐫𝐞𝐤𝐤𝐞𝐫𝐦𝐨𝐧𝐮𝐦𝐞𝐧𝐭 𝐢𝐬 𝐯𝐢𝐞𝐫 𝐨𝐬𝐬𝐞𝐰𝐚𝐞𝐧𝐬 𝐫𝐲𝐤𝐞𝐫

• 22 Julie 2023
• 𝐕𝐨𝐨𝐫𝐭𝐫𝐞𝐤𝐤𝐞𝐫𝐦𝐨𝐧𝐮𝐦𝐞𝐧𝐭

15 jaar na ’n museumeienaar se afsterwe word vier ossewaens aan die Voortrekkermonument geskenk

Christoffel Jacobus du Toit Viljoen en sy vrou, Jennifer Viljoen, het ’n huismuseum begin in die laat 1990’s. Na Viljoen se afsterwe in 2007 het sy vrou sy nalatenskap met trots bewaar. Die Viljoen-familie het met die Voortrekkermonument kontak gemaak en besluit om hierdie vier gesogte waens aan die Voortrekkermonument te skenk. Dit het die Voortrekkermonument se ossewa-familie na 18 ossewaens laat groei.

Viljoen sê dat daar geen ander plek in Suid-Afrika is wat hierdie waens ’n beter kultuurtuiste kan bied nie.

“𝐸𝑘 𝑠𝑘𝑒𝑛𝑘 𝑑𝑖𝑒 𝑤𝑎𝑒𝑛𝑠 𝑔𝑟𝑎𝑎𝑔 𝑎𝑎𝑛 𝑑𝑖𝑒 𝑉𝑜𝑜𝑟𝑡𝑟𝑒𝑘𝑘𝑒𝑟𝑚𝑜𝑛𝑢𝑚𝑒𝑛𝑡, 𝑤𝑎𝑛𝑡 𝑒𝑘 𝑤𝑒𝑒𝑡 𝑑𝑎𝑡 𝑑𝑖𝑡 𝑑𝑎𝑎𝑟 𝑏𝑒𝑤𝑎𝑎𝑟 𝑠𝑎𝑙 𝑤𝑜𝑟𝑑. 𝐷𝑖𝑡 𝑖𝑠 𝑣𝑖𝑟 𝑚𝑦 𝑢𝑖𝑡𝑒𝑟𝑠 𝑏𝑒𝑙𝑎𝑛𝑔𝑟𝑖𝑘 𝑑𝑎𝑡 𝑜𝑛𝑠 𝑘𝑖𝑛𝑑𝑒𝑟𝑠 𝑣𝑎𝑛 𝐽𝑎𝑛 𝑣𝑎𝑛 𝑅𝑖𝑒𝑏𝑒𝑒𝑐𝑘 𝑎𝑓 𝑜𝑛𝑠 𝑘𝑜𝑟𝑟𝑒𝑘𝑡𝑒 𝑔𝑒𝑠𝑘𝑖𝑒𝑑𝑒𝑛𝑖𝑠 𝑙𝑒𝑒𝑟. 𝐸𝑛 𝑎𝑠 𝑑𝑖𝑒 𝑚𝑜𝑛𝑢𝑚𝑒𝑛𝑡 𝑑𝑖𝑡 𝑘𝑎𝑛 𝑜𝑜𝑟𝑑𝑟𝑎 𝑎𝑎𝑛 ℎ𝑢𝑙𝑙𝑒 – 𝑓𝑎𝑛𝑡𝑎𝑠𝑡𝑖𝑒𝑠!”

Die Voortrekkermonument, in samewerking met die Rapportryers - RRB, het Saterdag 22 Julie vier ossewaens gaan oplaai in Lydenburg, Mpumalanga. Hierdie tog van naastenby 300 km is aangepak deur ’n konvooi wat bestaan uit die Jakaranda Rapportryers en die Voortrekkermonument. Die ossewaens het skares getrek op dié tog deur dorpe soos Lydenburg en Dullstroom, op pad na hul nuwe tuiste by die Voortrekkermonument.

“Dit is vir ons ’n groot voorreg om in die posisie te kan wees om hande te kan vat saam met ander kultuurorganisasies en individue wie se harte klop om ons Afrikanererfenis te bewaar. Dit is veral belangrik in ’n jaar soos hierdie waar ons die 185ste herdenking van die Slag van Bloedrivier en die Groot Trek herdenk dat daar bewusmakingaksies en projekte soos hierdie gebeur om die gemeenskap saam te trek,” sê Jaco Cilliers van die Voortrekkermonument.

Die Rapportryers se president, Johan Roos, sê dat dit vir hulle ’n baie groot voorreg is om betrokke te kan wees by so ’n historiese trek.

“Die samewerking tussen die Rapportryers en die Voortrekkermonument is vir my van kardinale belang, want die Voortrekkermonument word werklik vandag die kultuurtuiste van die Afrikaner. Dit is nie ’n reg nie, dit is uit en uit ’n voorreg en ons moet daarna kyk. Wat vir my ’n riem onder die hart is, is om te sien hoe die jong mans aktief betrokke raak om ons erfenis te bewaar vir die nageslag.”

Viljoen sê dat sy nie kan wag om vir die ossewaens – wat vir meer as 25 jaar in haar en haar man se bewaring was – by hulle nuwe tuiste te kom kuier nie.

Rapportryers - Provinsiale beraad

• 10 Junie 2023
• Johan Roos

Die Rapportryers het die afgelope Saterdag 'n suksesvolle Provinsiale raadsvergadering gehad by die Voortrekkermonument in Pretoria.

RRB Groete

Johan Roos

Bybelvasvra 2023

• 10 Maart 2023
• Dr. Hennie Schmidt

Jakaranda-korps - Huis Hermon ouetehuis braai

• 18 Februarie 2023
• Johan Roos

Die Rapportryers van die Jakaranda-korps in Pretoria, het die afgelope Saterdag 'n uiters suksesvolle en baie gesellige braai aangebied by Huis Hermon ouetehuis in Pretoria-Noord.

Die inwoners het die geleentheid werklik geniet en die braai baie waardeer. Hulle is deur vyftien lede van Jakaranda-korps onthaal en op die hande gedra.

Mens besef nie altyd wat die behoeftes en selfs wense in die ouetehuise is nie, die inwoners smag ook deurentyd na iets anders.
Die personeel het die geleentheid baie waardeer en hul opregte dank uitgespreek teenoor die Rapportryers van die Jakaranda-korps.

RRB Groete

Johan Roos

CHARLIZE THERON

• 18 November 2022
• David Fensham

Ek het vandag amper in my Boeretroos verstik toe ek oor die radio 'n baie bekende aktrise hoor sê het dat Afrikaans besig is om uit te sterf...dat daar net 44 Afrikaanssprekendes, van my soort mense, mense wat dieselfde taal as ek praat, in die wêreld oor is. Terloops, Boeretroos is koffie, Charlize. Jy doop jou beskuit daarin. Soos toe jy nog 'n kind was in Benoni. Dit doen jy terwyl jy oor die draadloos na bekende kunstenaars soos Koos du Plessis, Laurika Rauch, Johannes Kerkorrel, Theuns Jordaan, Ricus Nel, Bernice West, Steve Hofmeyer of enige van die ander meer-as-44-Afrikaanse kunstenaars luister. Salig op die oor is my moedertaal. My opregte verskoning aan die ander duisende Afrikaanse kunstenaars wat ek uitgelaat het: die koerant laat net vir my 'n beperkte aantal woorde om my sê te sê...

Jong Bybelkenners blink uit in vasvrawedstryd

• 4 November 2022
• Maroela Media

Twee jong leerders van Laerskool Northmead in Benoni se uitsonderlike Bybelkennis het onlangs gesorg dat hulle met die louere weggestap het by die jaarlikse nasionale Bybelvasvrawedstryd vir laerskoolleerders.

v.l.n.r Lizet van Rensburg, Jeaney van Rensburg, Annika van der Walt, Annelize van der Walt.

Die Bybelvasvra is ʼn vlagskipprojek wat in 1977 deur die Rapportryersbeweging (RRB) van stapel gestuur is om Bybelkennis by jong mense regoor die land te bevorder.

Rapportryerbeweging Bybelvasvra finaal

• 24 Oktober 2022
• Johan Roos

Die Rapportryerbeweging (RRB) het die naweek van 21, 22 en 23 Oktober 2022, die eer en voorreg gehad om die finaal van hul nasionale vlagskip projek, die Bybelvasvra, vir Laerskool leerlinge aan te bied. Die finaal was aangebied by die ATKV-oord, Klein-Kariba.

Die top tien spanne wat gekwalifiseer het vir die finaal, in alfabetiese volgorde, soos volg;

Constantiapark	Pretoria
Elarduspark	Pretoria
Henospark	Pretoria
Mooirivier	Potchefstroom
Northmead	Benoni
Pietersburg-Oos	Pietersburg
Randhart	Alberton
Rustenburg	Rustenburg
Stephanus Roos	Pretoria
Wierdapark	Pretoria

Spanne bestaan uit 4 leerlinge van Graad 5 tot en met Graad 7, met een of meer afrigters/spanleiers.
Hoofstukke uit die Ou-en Nuwe Testament word behandel.
Een uitdunrondte word gedurende Augustus gehou, waarna die top 10 spanne wat die beste presteer het, deurdring na die finaal in Oktober.
Die vraestelle word ook in engels aangebied.
Skole en kerke is baie welkom om spanne in te skryf vir die Bybelvasvra.

Die 2022 wenner van die RRB-BYBELVASVRA wat met die louere weg geloop het, was;

Laerskool Northmead van Benoni.

In die tweede plek was Laerskool Hennopspark van Pretoria, in die derde plek was Laerskool Randhart van Alberton.

Wat die oorwinninging van Laerskool Northmead nog meer merkwaardig maak, is die feit dat die span uit slegs twee leerling bestaan het.
Hulle was ook afgerig deur beide die twee leerling se moeders.
Voorwaar 'n buitengewone uitsonderlike prestasie.

'n Foto van die wenspan;

v.l.n.r Lizet van Rensburg, Jeaney van Rensburg, Annika van der Walt, Annelize van der Walt.

Die top 10 spanne wat tydens die finaal meegeding het.

Die gees en gesindheid, die samehorigheid was deurentyd eenvoudig 'n belewenis om te ervaar.

Baie dankie aan al die spanne wat ingeskryf het, die RRB waardeer dit opreg.

SKORSING VAN PRIMARIA - NWU

• 17 September 2022
• Johan Roos

Die Rapportryerbeweging (RRB) neem met skok en teleurstelling kennis dat die Primaria van Karlien-dameskoshuis, by die Noordwes-Universiteit (NWU) in Potchefstroom, van haar pligte onthef is. Sy het tydens 'n koshuisdinee Afrikaans gepraat.

Dit is werklik jammer dat daar deurlopend by Afrikaanssprekendes gekrap moet word waar dit nie juk nie. Ons het dit werklik nie nodig nie. Beslis nie die kommentaar van die EFF en ander anti-Afrikaansgesindes nie.

Aan die Primaria van Karlien, die RRB is trots op jou. Suid-Afrika het beslis meer van jou kaliber studente nodig, en sou daar enige aksies teen jou geneem word, sal jy beslis nie alleen staan nie.

Dit is werklik jammer dat studente se demokratiese reg in gedrang moet kom. Spontaniteit, en alles wat daarmee gepaard gaan, moet vernietig word as Afrikaans as taal ter sprake kom.

Ek wonder of die Rooi-brigade bewus is van die feit dat Afrikaans by sommige universiteite in Europa aangebied word – 'n vak wat jaarliks in gewildheid toeneem. Maak dit dalk anti-Afrikaansgesindes jaloers, en jaag dit selfs sommiges die harnas in?

Die RRB hou die verwikkelinge by die NWU deurlopende dop.

LANK LEWE AFRIKAANS!

Johan Roos
President – Rapportryerbeweging

Die Rapportryerbeweging (RRB) se jaarlikse nasionale kompetisie, die BYBELVASVRA vir Laerskool leerlinge, se uitdunrondtes is pas afgehandel.

• 7 September 2022
• Johan Roos

Die top 10 spanne nasionaal, wat deurdring na die finaal, in alfabetiese volgorde, is soos volg;

Constantiapark	Pretoria
Elarduspark	Pretoria
Henospark	Pretoria
Mooirivier	Potchefstroom
Northmead	Benoni
Pietersburg-Oos	Pietersburg
Randhart	Alberton
Rustenburg	Rustenburg
Stephanus Roos	Pretoria
Wierdapark	Pretoria

Die RRB bied die kompetisie vanjaar vir die 43 ste agtereenvolgende jaar aan.

Gedurende 2020 kon die Bybelvasvra-kompetisie ongelukkig nie plaasvind nie, as gevolg van die Covid19 pandemie.

Die finaal word aangebied by Klein-Kariba, die naweek van 21, 22 en 23 Oktober 2022.

Die RRB wens die top 10 spanne sterkte toe met die voorbereiding en sien daarna uit om hul belangrike gaste die naweek te onthaal.

Ons opregte dank ook aan al die spanne wat ingeskryf het, dit word opreg waardeer.

Johan Roos
President – Rapportryerbeweging

Afriforum se skitterende alternatief tot Suid-Afrika se sukkelende, mislukkende toestand tans
FEDERALISME

• 3 Augustus 2022
• Johan Roos

Die Rapportryerbeweging (RRB) neem met dank en waardering kennis van Afriforum se praktiese en sinvolle oplossings vir Suid-Afrika se baie probleme.

Weereens slaag Afriforum daarin om op 'n heel haalbare wyse, probleme in ons land aan te spreek en met werkbare voorstelle vorendag te kom om die toestand, tans in ons land, nie net te veroordeel nie, maar werklike positiewe voorstelle aan die hand te doen oor hoe ons almal kan saamwerk om die situasie tot almal se voordeel te verbeter.

Die Sewebeen-federale toekomsplan is uitstekend saamgestel en vind by die RRB baie groot byval.

Suid-Afrika is beslis ook ons tuiste, ondanks alles is, en bly ons lief en trots op ons land. Die RRB verval, net soos Afriforum en die Solidariteitbeweging, beslis nie in moedeloosheid nie.

Derhalwe is dit die RRB se wens en doelwit om graag saam te werk om van Suid-Afrika 'n land te maak waar ons gelukkig, voorspoedig en in vrede saam met almal kan leef en werk, asook om wedersyds erkenning en respek tussen al die kultuurgemeenskappe in ons pragtige land te bevorder.

Net so sal die naam van die Afrikaanse Taalmonument ook bly.

Johan Roos
President – Rapportryerbeweging

Nuwe generasie Rapportryers dra nog die boodskap

• 31 Julie 2022
• Maroela Media

Vir Afrikaanssprekende Christene met 'n liefde vir die Afrikaanse taal en die Afrikanerkultuur is daar 'n tuiste: Die Rapportryerbeweging.

DIE AFRIKAANSE TAALMONUMENT

• 2 Junie 2022
• Johan Roos

Die RRB wil dit duidelik en onomwonde stel dat ons genoeg gehad het van die regering wat Afrikaans, en alles wat daarmee gepaard gaan, af te takel en in die grond in te vertrap. Genoeg is nou genoeg.

Gedurende die vorige boekjaar het die regering R97 miljoen aan Freedom Park oorhandig. Daarteenoor het die Voortrekkermonument geen bydrae van die regering ontvang nie.

Die Tienpuntplan vir erfenisbewaring, wat pas deur Flip Buys van Solidariteit daargestel is, sien die RRB as 'n werkbare oplossing. Met die uitsprake en houding van die regering en sy ampsdraers, is daar ongelukkig in Suid-Afrika geen ander weg om te volg indien die regering enigsins daarna streef om vrede en voorspoed te bewerkstellig nie.

Die RRB wil ook graag van die geleentheid gebruik maak om 'n baie ernstige beroep op die president, mnr. Cyril Ramaphosa, te doen om alle ANC-ministers en ampsdraers te versoek om die geskiedenis en agtergrond daarvan te bestudeer vóórdat hulle belaglike uitsprake lewer wat totaal van die waarheid ontbloot is. Dit doen niemand goed nie, en stel ons land wêrelwyd in 'n baie swak lig.

Die regering van die dag moet verseker daarvan wees dat ons as Afrikaners hier aan die suidpunt van Afrika is om te bly. Daaroor moet asseblief geen twyfel bestaan nie.

Net so sal die naam van die Afrikaanse Taalmonument ook bly.

Rapportryergroete

Johan Roos
President – Rapportryerbeweging

Rapportryers Landsberaad 2022

• Vrydag om 18:00PM
• Rustenburg

Landsberaad 2022 wenners